Presidenti i Turqisë, Recep Tayyip Erdogan ka komentuar vendimin e Parlamentit Evropian, teksa ky i fundit miratoi kërkesën për ndalimin e operacionit “Dega e Ullirit”.
Por, mjaft i ashpër ka qenë reagimi i presidentit turk, Erdogan, i cili deklaroi sot se vendimi i Parlamentit Evropian mbi operacionin “Dega e Ullirit” nuk ka kurrfarë vlere, raporton Anadolu Agency (AA).
“Ne jemi nikoqirë të 3.5 milionë sirianëve për shtatë vjet. Po të kishim hapur kufijtë ju do të kërkonit vend për t’u fshehur. Na u jeni lutur që të mos hapim kufijtë. Ne kemi vepruar me humanizëm, por ju nuk dini asgjë nga humanizmi. Tani merrni çfarëdo vendimi që doni. Në njërin vesh hyn e në tjetrin del. Edhe ashtu vendimet që ju merrni nuk vlejnë asgjë”, ka thënë Erdogan para Kongresit të zakonshëm të AK Partisë në Erzurum.
Lidhur me këtë vendim të PE-së ka reaguar edhe Ministria e Jashtme e Turqisë, në të cilën theksohet se ky vendim për Turqinë është i papranueshëm.
“Nuk mund të pranojmë vendimin e PE-së i cili është i njohur për tolerancë ndaj organizatave terroriste. Turqia, ashtu siç ka vepruar në të kaluarën, me vendosmëri do të vazhdojë luftën kundër të gjitha formave të terrorizmit”, thuhet në deklaratën e MPJ-së turke.
Ministria e Punëve të Jashtme të Turqisë kujton se operacioni “Dega e Ullirit” filloi në përputhje me të drejtën e legjitime të mbrojtjes sipas nenit 51 të Kartës së OKB-së dhe vendimeve të luftës kundër terrorizmit të Këshillit të Sigurimit të Kombeve të Bashkuara (OKB).
