Partia Demokratike i ka dorëzuar kreut të Kuvendit Gramoz Ruçi një kërkesë për interpelancë urgjente me ministrin e Infrastrukturës dhe Energjisë, Damian Gjiknuri, në lidhje me koncesionet e dhëna nga qeveria për inceneratorët e Elbasanit, Fierit dhe Tiranës.
Kreu i grupit parlamentar të PD-së, Edmond Spaho kërkon që të bëhet përfshirja e interpelancës si pikë e parë e rendit të ditës së seancës plenare të datës 14 shkurt 2018.
“Rreth këtij skandali të përmasave të paimagjinueshme nuk ka pasur asnjë reagim në përputhje me detyrimet që i burojnë nga ligji nga ana e Ministrisë së Infrastrukturës dhe Energjisë. Gjithashtu na duhet të vëmë në dukje se ministria nuk i është përgjigjur shkresave të drejtuara nga deputetët e opozitës duke e thelluar edhe më skandalin”, shkruhet ndër të tjera në kërkesën drejtuar Ruçit.
Sipas demokratëve “rezulton se një individ i vetëm i ndërlidhur me disa kompani në mënyrë të tërthortë apo të dukshme ka qenë përfituesi i vetëm i tre inceneratorëve. Gjithashtu, vërehet se praktika e ndjekur nga qeveria për dhënien e koncesionit në fjalë është abuzive, pasi është kompania e krijuar pak ditë përpara fitimit të këtij koncesioni që ka paraqitur një propozim të pakërkuar, dhe kompania nuk ka asnjë kontratë të ngjashme në këtë sektor”.
“Njëra prej kompanive që ka fituar koncesionin e inceneratorëve është e regjistruar në Parajsat Fiskale të Vendeve të Ulëta (Holandës) duke shtuar edhe më dyshimin për një aferë korruptive që do të ketë pasoja të rënda jo veç në financat e buxhetit të shtetit, por edhe në shëndetin e shqiptarëve. Sot, kompania që ka fituar në mënyrë të dyshimtë koncesionin e inceneratorëve ka përfituar nga buxheti i shtetit 5.2 milionë euro për impiantin e mbetjeve në Fier, ndonëse ky i fundit nuk ka nisur akoma punën e banorët janë në protestë”.
PD-Kerkese Per Interpelance Me Gjiknurin by Tirana Today on Scribd
