Menjëherë pas vizitës për inspektim të kryeministrit, Edi Rama, në Fier, Partia Demokratike e këtij qyteti ka kallëzuar në prokurori kryebashkiakun Armand Subashi, për abuzim me detyrën.
Sipas kreut të PD-së Fier, Luan Baçi, bashkia e këtij qyteti ka bërë prishje selektive në funksion të rikonstruksionit të bulevardit kryesor të qytetit.
“Kemi bërë kallëzim penal ndaj kryetarit të Bashkisë Fier, Subashi, duke u nisur prej shumë ankesave nga qytetarët tek dega e Partisë Demokratike Fier, por edhe si këshilltarë të djathtë për punimet që bëhen në infrastrukturën e qytetin tonë, dhe të fokusuar jemi tek prishjet selektive”, tha Baçi për mediat.
Bashkia e Fierit ka reaguar menjëherë pas kësaj deklarate, por edhe për kallëzimin e bërë nëpërmjet kreut të inspektoriatit ndërtimor, i cili ka sqaruar se çdo prishje në zonë, është bërë sipas projektit urbanistik.
