PD dënon shkarkimin nga puna të gazetarëve Simon Shkreli dhe Eliona Shkreli

Partia Demokratike dënon shkarkimin nga puna të gazetarëve Simon Shkreli dhe Eliona Shkreli, nga pronari i televionit Channel 1 në Shkodër, Agron Çela, që është deputeti i Ilir Metës dhe një prej oligarkëve të mazhorancës, për shkak të një statusi në Facebook të gazetarit ku ai shprehte pakënaqësinë për zgjedhjen e Metës president.
Kjo është një formë e re dhe e papranueshme e censurës, ku pronarët e lidhur me qeverinë kërkojnë të kontrollojnë edhe hapësirat personale të gazetarëve, siç është Facebook.
Një fenomen në rritje ky, pasi Edi Rama, Ilir Meta dhe republika e vjetër e zhytur në krim e pazare, pasi kanë kapur pjesën më të madhe të medias, nuk durojnë as kritikat në rrjetet sociale.
Një ditë pasi mbajti fjalën në Parlament, ku tha se ai zgjedh demokracinë, Ilir Meta provoi se është binjaku i Ed​i Ramës si censor dhe shtypës i fjalës së lirë. Gazetari i njohur, Simon Shkreli, dhe bashkëshortja e tij u pushuan nga puna prej pronarit të televizionit në Shkodër, deputetit, mikut dhe oligarkut të kësaj mazhorance, vetëm për një opinion në rrjetin social.
Kjo formë e rëndë censure dhe shtypje e mendimit të lirë është në ditët e fundit dhe shpejt do të bjerë bashkë me republikën e vjetër të krimit, të drogës, të koncesioneve, tenderave e oligarkëve që kanë kapur edhe median në vend.