Nënkryetari i Partisë Demokratike, Oerd Bylykbashi, e ka cilësuar pjesëmarrjen e Diasporës në zgjedhjet e 11 majit si një reformë të jashtëzakonshme në historinë e procesit zgjedhor në Shqipëri. I ftuar në një emision televiziv, Bylykbashi tha se numri i lartë i të regjistruarve nga diaspora ka kapur në befasi Partinë Socialiste, duke e nxjerrë jashtë kontrollit sistemin e saj të patronazhistëve.
Sipas Bylykbashit, vota e Diasporës është bërë realitet pas një përpjekjeje të gjatë dhe përfaqëson një nga arritjet më të mëdha të opozitës në reformën zgjedhore. Ai theksoi se PS kishte llogaritur një pjesëmarrje shumë më të ulët nga emigrantët, duke qenë e bindur se ata nuk do të interesoheshin për t’u regjistruar.
“Ne jemi përpara një reforme gjigande, që ka nxjerrë jashtë loje sistemin e patronazhistëve të PS-së. Ata nuk e kishin parashikuar këtë shpërthim të Diasporës dhe nuk e kanë më nën kontroll,” tha Bylykbashi.
Ai argumentoi se PS ka bërë gjithçka për të penguar pjesëmarrjen e Diasporës, duke refuzuar disa ndryshime ligjore që do të lehtësonin regjistrimin e emigrantëve me dokumente të skaduara apo me pasaporta të vendeve të tjera.
“PS refuzoi që emigrantët me dokumente të skaduara të votonin. Nuk donin që ata të regjistroheshin, sepse nuk ishin pjesë e tabelës së patronazhistëve të tyre. Kjo është një përpjekje për të manipuluar zgjedhjet që në nisje,” u shpreh ai.
Bylykbashi shtoi se numri i regjistrimeve mund të arrijë deri në 270 mijë votues, një shifër që, sipas tij, mund të ndikojë në shpërndarjen e mandateve në shumë qarqe. Ai e cilësoi këtë si një arritje të opozitës, që po shënon një moment të rëndësishëm në historinë e demokracisë shqiptare.
