Konsumatorët shqiptarë duhet të përgatiten për një rritje të mundshme të çmimit të vezëve si pasojë e përhapjes së gripit të shpendëve H5N1. Eksperti i ekonomisë bujqësore, Fatmir Guri, ka paralajmëruar se kostoja do të varet nga numri i fermave të prekura dhe masat e bio-sigurisë që ato zbatojnë.
Në Shtetet e Bashkuara, i njëjti virus ka sjellë rritje të ndjeshme të çmimit të vezëve, nga 18 cent për kokërr në tetor, në afërsisht 1 dollar, që përfaqëson një rritje prej 500%.
H5N1 është një virus agresiv që mund të shfarosë të gjithë koloninë e shpendëve të një ferme brenda disa ditëve. Për të mbrojtur bizneset dhe konsumatorët, fermat duhet të respektojnë masat strikte të bio-sigurisë, pasi rimëkëmbja e një ferme pas një shpërthimi kërkon të paktën 6 muaj.
Ekspertët rekomandojnë që mishi dhe vezët të gatuhen në temperatura mbi 70°C për të shmangur çdo infeksion të mundshëm te njerëzit.
