Të pasurit bëhen më të pasur, ndërsa ajo që humbet është “gjenerata e mijëvjeçarit”. Por jo të gjithë janë në dijeni me faktin se gjysma e pasurisë globale zotërohet nga 1 për qind e shtresës së pasur. “Sipas tregjeve financiare Buoyant, pasuria globale u rrit me 6.4% në 12 muajt e fundit, deri në qershor, njëkohësisht ritmi më i shpejtë që nga viti 2012. Dhe sipas Institutit të Kërkimeve të Credit Suisse mbi raportin e pasurisë globale, numri i të pasurve u zgjerua sërish me rreth 2.3 milionë milionerë të rinj që iu shtuan totalit të të pasurve”– shkruan The Economist.
Raporti nënvizon ndarjen e mprehtë midis të pasurve dhe pjesës tjetër. Nëse pasuria e botës do të ndahej në mënyrë të barabartë, secila familje do të kishte 56.540 dollarë. Por në vend të kësaj, vetëm 1% i më të pasurve zotëron më shumë se gjysmën e pasurisë globale. Mesatarisht pasuria e çdo familjeje është vetëm 3.582 dollarë. Nëse zotëron më shumë se kaq, ju bëni pjesë në 50% e më të pasurve të popullsisë së botës.
Amerika vazhdon të mbizotërojë në radhët e milionerëve me rreth 43% të totalit global. Japonia dhe Britania kishin pësuar një rënie në listën e milionerëve më të pasur të botës në krahasim me atë të vitit 2016, kryesisht për shkak të rënies së jenit dhe të sterlinës.
Ekonomitë e vendeve në zhvillim kanë shënuar rritje të konsiderueshme dhe tani zënë rreth 8.4% të totalit të pasurisë globale, nga 2.7% në vitin 2000.
Në 12 muajt në të cilat u krye edhe raporti, fitimet më të mëdha proporcionale në pasuri kanë ndodhur në shtete si në Poloni, Izrael dhe në Afrikën e Jugut, falë një kombinimi të fitimeve të bursës dhe monedhës. Egjipti është humbësi më i madh, duke humbur pothuajse gjysmën e pasurisë (e llogaritur në dollarë). Zvicra është ende vendi me mesataren më të lartë të pasurisë për person.
“Ky është një hendek i gjerë brezash: millennials (ata që arritën moshën madhore në mijëvjeçarin e tanishëm) u duhet shumë punë për t’u bërë pjesë e më të pasurve. Amerikanët, midis moshës 30 dhe 39 vjeç llogariten të kenë grumbulluar mesatarisht 46% më pak pasuri në vitin 2017, në krahasim me grumbullimin e pasurisë që arriti grupmosha e tyre në vitin 2007”-shkruan Monitor.al.
Borxhet e larta të studentëve dhe vështirësia për të qenë të aftë të bëhen pronarë të shtëpive që kanë me qira, ua kanë vështirësuar punën millennials për të krijuar dhe për të grumbulluar pasurinë e tyre. Kjo pabarazi mund të kthehet në disfavor të gjeneratës së baby boomers, të cilët tani po i afrohen daljes në pension. Kur ata të vendosin t’i shesin pronat e tyre, atëherë edhe do të zbulojnë se gjenerata e millenials nuk do të jetë në gjendje të përballojë blerjen e tyre me çmimet.
