Nxënësit e të gjitha klasave mësimore do të testohen për “nivelin e nxënies monline”. Sipas Qendrës së Shërbimeve Arsimore, do të testohen fëmijët nga klasa e parë në të njëmbëdhjetën.
Nga ky test do përjashtohen vetëm maturantët, të cilët i pret një sezon i gjatë testimesh. “Qendra e Shërbimeve Arsimore po punon fort për të nxjerrë një set testesh nga klasa e I-XI të natyrës diagnostikuese që do t’i çojmë këtë javë në të gjithë Shqipërinë. Nuk është qëllimi për të vlerësuar nxënësit me notë, por për të vlerësuar situatën, për të parë në cilat koncepte, aftësi ata kanë boshllëqe, me qëllimin që kur të vijë shtatori të ndërtohet një strategji që ato të cilat quhen koncepte kyçe në të nxënit e një fëmije, koncepte bazë në lëndët e formimit të fëmijës, të ripërsëriten vitin shkollor që vjen në një aspekt shumë më të thelluar se sa në kushtet e pandemisë”, deklaron drejtoresha e QSHA-së, Rezana Vrapi.
Sipas Vrapit, për nxënësit nuk do të ketë vlerësim me nota nga ky testim, por thjesht do të jenë orientuese për hartimin e politikave të Ministrisë së Arsimit në vitin e ardhshëm mësimor.
Një politikë e tillë testimi është ndjekur më herët për mësuesit që në vitin 2013-ën. Por këto teste nuk janë zhvilluar rregullisht çdo vit. Ndonëse ka qenë provim i mirëfilltë për mësuesit, Ministria e Arsimit nuk e ka quajtur asnjëherë të tillë. Provime të tilla njihen me termin “identifikim i nevojave të mësuesve për zhvillim profesional”.
