Sot në plazhin e Velipojës ka humbur jetën një pushues. 76 vjeçari nga Kosova ka mbetur në det dhe pasi i është dhënë ndihma mjekësore në një Qendër Shëndetësore nuk ka mundur të shpëtojë. Mësohet se grupi hetimor po merret me sqarimin e rrethanave të ngjarjes.
Siguria në plazhe në Shqipëri vijon të jetë një problem. Në sezonin e fundit turistik janë mbytur shumë pushues. Në plazhe mungojnë rojet bregdetare dhe ndihma e shpejtë. Pushuesit ndihen të pasigurt ndërkohë që strukturat përkatëse nuk mbajnë përgjegjësi për të vendosur rojet bregdetare. Gjithashtu përdorimi i mjeteve lundruese pranë pushuesve paraqet rrezikshmëri, por nuk janë marrë akoma masa për ti ndaluar.
Kujtojmë se vetëm para pak ditësh në plazhin e Velipojës u mbyt një 13 vjeçar nga Mitrovica dhe një 35 vjeçar po ashtu nga Kosova. Plazhet e tjera nuk kanë qenë më pak të rrezikshme, në Vlorë, Shën Gjin, Durrës dhe Lezhë janë mbytur të tjerë pushues, të cilët ose kanë qenë në det ose kanë hyrë për të shpëtuar personat që kanë kërkuar ndihmë.
I bujshëm ishte rast i 24 vjeçarit nga Tetova që hyri në det për të shpëtuar dy motra që po mbyteshin, në Zvërnec të Vlorës. Ai kishte ardhur të pushonte bashkë me të fejuarën e tij, por nuk mundi të shpëtojë.
