Qeveria e Kosovës, zgjedhjen e Aleksandër Jabllanoviç në krye të Listës Serbe, nuk po e sheh si problem, pavarësisht ofendimit të nënave kosovare.
“Lista Serbe ka të drejtë të zgjedhë këdo në këto pozita, përveç në rastet ku emërime të tilla kanë të bëjnë me emërime dhe shkarkime nëpër ministri.” – ky ishte arsyetimi për rikthimin e Jabllanoviç si kryetar të këtij subjekti.
“Kryeministri ka nënshkruar marrëveshje koalicioni me Listën Serbe. Është Lista Serbe dhe elektorati i tyre që i zgjedhin përfaqësuesit e vetë, përpos kur kemi të bëjmë me emërime dhe shkarkime të ministrave dhe pozitave tjera ekzekutive”, tha Gecaj, këshilltari i kryeministrit Mustafa.
Jabllanoviç ishte shkarkuar nga posti i ministrit nga kryeministri Mustafa, kur ai ofendoi rëndë nënat gjakovare gjatë protestave.
“Kjo është festë e shenjtë dhe e madhe. Egërsirat që i parandaluan serbët për të ardhur në shtëpitë e tyre të djegura, nuk do t’i shërbejnë askujt. Ne do të kërkojmë llogari nga ministri i Brendshëm për këtë që ndodhi”, tha Aleksandër Jabllanoviç para se të shkarkohej.
Përfaqësuesit serbë thanë se nuk janë në dijeni për rikthimin e Jabllanoviç në krye të Listës.
