Transferimi i Neymar nga Santos tek Barcelona gjithmonë është kundërshtuar dhe ka lënë të zhgënjyer drejtuesit e ekipit brazilian. Këtë fakt e ka zbuluar ish-presidenti i Santos, Luis Alvaro de Oliveira Ribeiro, i cili është ndarë nga jeta në gusht të viti 2016, pasi ka lënë një letër nëpërmjet së cilës ka dashur të sqarojë atë që ka ndodhur në të vërtetë mbi transferimin e Neymar te Barcelona, duke shprehur indinjimin e tij për mënyrën si babai i brazilianit i është vardisur klubit katalanas, ndërsa lojtari kishte akoma një kontratë me ekipin brazilian.
Letra, e cila është shkruar në marsin e 2016-ës, është publikuar nga e përditshmja “Folha de Pernambuco”. “Santos dhe unë nuk kemi marrë asnjë informacion ose dokument në lidhje me faktin se para Botërorit për Klube (2011) babai i Neymar kishte arritur një marrëveshje me Barcelona-n dhe ishte paguar për këtë”, shkruhet në letrën e ish-presidentit.
Santos e ka luajtur atë finale me një lojtar që kishte marrë para nga skuadra rivale, që ka ndikuar te paraqitja e tij në atë takim. “Ai nuk ka luajtur si zakonisht. E kam thënë këtë para gazetarëve dhe, fatkeqësisht, është një fakt. Kontrata e tij me Santos ishte në fuqi dhe ai e kishte për detyrë ta respektonte”.
