Pasi ka kaluar një vit nga dhuna e ushtruar ndaj biznesmenit libanez Faadi Mitri dhe braktisjes së tij të një investimi prej 180 milionë euro që pritej të ndërtohej në zonën e Gjirin të Lalzit, prona e lënë pezull tashmë është uzurpuar
Bëhet e ditur se persona me shufra hekuri dhe me mjete të tjera të forta kanë bërë një tjetër rrethim për ta kthyer në pronë të tyren tokën që biznesmeni kishte blerë për një investim të madh.
Prona në të cilën do të ndërtohej resorti është rrethuar gjatë ditës së djeshme nga persona të cilët pretendojnë pronësinë e tokës. Gjithashtu personat në fjalë kërcënuan edhe rojet privatë që ishin aty.
Personat në fjalë, nën shoqërinë e një topografi kanë prishur rrethimin e pronës së Faadi Mitrit dhe më pas kanë ndërtuar një gardh të ri, duke mos lejuar as policinë private që kishte detyrë ruajtjen e objektit.
Ndërsa Hipoteka e Durrësit pretendon se prona është nën sekuestro. Lidhur me këtë ngjarje ka reaguar administratorja e investitorit libanezo-amerikan, e cila ka bërë një denoncim për rastin. Më pas Policia e Durrësit i ka referuar materialet në prokurori.
