Zinedine Zidane pak ditë më parë befasoi me vendimin për tu larguar nga pankina e Real Madrid ku në 2 vite e gjysmë arriti të fitonte gjithçka. Menjëherë pas dorëheqje u përfol se ai do të merrte drejtimin e kombëtares franceze, zëra që shqetësuan trajnerin aktual Didier Deschamps por që mund të sillnin edhe trazira në prag të Botërorit.
Por duket se këto zëra nuk janë aspak të vërtetë, këtë e ka konfirmuar vetë presidenti i Federatës franceze të Futbollit, Noël Le Graët, që deklaroi se në drejtimin e “Bluve” do të jetë Deschamps deri në vitin 2020, vit kur përfundon edhe kontrata e tij. “Deschamps ka një kontratë me ne deri në vitin 2020. Nuk ka asnjë klauzolë negative në të. Ai do të qëndrojë”, tha Le Graët në një intervistë për radion “RMC”. “Pas këtij viti do të shohim se çfarë do të ndodhë me të”.
Ndërsa kur presidenti u pyet për shanset që ka Zidane për të drejtuar një ditë kombëtaren, ai u përgjigj se është mirë që ti jepet fund njëherë e mirë kësaj situate, pasi ai nuk ka komunikuar në asnjë mënyrë me ish-trajnerin e Realit të Madridit për këtë çështje.
Më pas, Le Graët bëri të ditur objektivin e skuadrës së Francës, që është kalimi të paktën deri në gjysmëfinale, që do të ishte një rezultat më i mirë sesa ai i Botërorit 2014, kur Franca u eliminua në çerekfinale, duke bërë të ditur më pas edhe shpërblimet për futbollistët në rast të arritjes së objektivit. Nëse Franca do të arrijë në gjysmëfinale, lojtarët e Francës do të përfitojnë 100-150 mijë euro, nëse do të kalojnë në finale ata do të përfitojnë 280 mijë euro secili.
