Pas humbjes me Partizanin ekipi i Vllaznisë duket se ka siguruar rënien në Kategorinë e Parë. Shkodranët u shfaqën sërish të dorëzuar dhe pa aspak grintë e ide, duke mos arritur të rrezikojnë portën e Alban Hoxhës, ndërsa pësuan edhe dy gola naivë për një mbrojtje me eksperiencë në Superiore. Shpresat e vakta për t’i shpëtuar rënies nga kategoria, detyruan trajnerin kryeqytetas që të largohej nga klubi shkodran 2 ndeshje nga fundi i kampionatit.
Menjëherë pas ndeshjes duket se trajneri Ernest Gjoka që drejtoi “anijen” e Vllaznisë deri në këto momente e ka braktisur dhe nuk ka pranuar të flasë për mediat. Një dorëheqje në këtë pikë të kampionatit kur janë edhe dy ndeshje për tu luajtur, nuk duket lëvizje aspak serioze nga Gjoka, por mbetet për tu parë se çfarë do të ndodhë. Gjoka është shprehur se: “Me atë që pashë sot në fushë nuk do të vazhdoj më të jem trajner i Vllaznisë, do të bisedoj me drejtuesit e do largohem”.
