Shqipëria U-21 është mposhtur ditën e sotme në “Selman Stërmasi” nga ekipi i Sllovakisë dhe ka humbur çdo shans për të qenë në Europianin 2019. Një ndeshje e nisur në favor të kuqezinjve, të cilët kontrollojnë lojën nga minuta e parë dhe në fundin e pjesës së parë gjejnë avantazhin me Rey Manaj. Pavarësisht barazimit në fillim të së dytës është sërish Manaj që kalon në avantazh kuqezinjtë, por që në 10’ minutat e fundit përmbyset gjithçka nga sllovakët.
Trajneri Alban Bushi foli pas ndeshjes në konferencën për shtyp. Sipas tij, Shqipërinë e penalizoi fakti që në këtë takim kishte shumë debutues.
“Në fillim dua të përgëzoj ekipin për zëmrën që dhanë në fushën e lojës. Mendoj se aty ku ne kishim frikë në 20-minutat e fundit, atje u ndëshkuam. Nuk dua të justifikohem, por kishim shumë debutues që kanë luajtur në këtë takim.
Patjetër që kjo humbje na nxjerr nga gara, por jam shumë i gëzuar, pasi ekipi i ka kryer detyrat deri në minutën e 70-të. Luajtëm përball një ekipi që ka minuta në këmbë, ndërsa futbollistët tanë, nuk luajnë titullarë në ekipet e tyre. Kjo na ka penalizuar, megjithatë kjo Shqipëri premton për të ardhmen.
Nuk kisha luksin e stolit, për t’i ndërruar futbollistët në rolin e tyre. Kam futur një mbrojtës në vendin e mesfushorit. Ajo që unë dua të them, është se nuk kemi humbur se kemi luajtur në mënyrë të keqe. Kemi dominuar gjithë lojën dhe jemi ndëshkuar me dy gola në minutat e fundit. E dija që ai terren i vështirë do të favorizonte kundërshtarët”, është shprehur trajneri Bushi.
