Pasi mbylli një sezon mjaft të mirë me Arsenalin, Granit Xhaka po shkëlqen edhe në Kupën e Botës. Goli shënuar kundër Serbisë dhe më pas festa me shqiponjë që u diskutua në të gjithë botën e kanë rritur famën e tij. Mesfushori kosovar mbron ngjyrat e Zvicrës në këtë Botëror dhe deri tani janë në rrugën e duhur, pasi kanë ndalur edhe një kundërshtarë të ‘frikshëm’ si Brazili.
Goli ndaj Serbisë, nga një distancë e largët, është kandidat si një ndër golat më të bukur të Botërorit deri tani. Por duket se pas këtyre paraqitjeve Graniti ka fituar mbështetës edhe në Iranin e largët. Pasi kombëtarja e tyre u eliminua disa tifozë në Teheran kanë bërë një gjest mjaft të bukur në mbështetje të Xhakës.
Tifozët iranian kanë pikturuar portretin e Granit Xhakës dhe sulmuesit Breel Embolo në një mural tek Ambasada Zvicerane, raporton tg. Fotot janë shpërndarë jashtëzakonisht shumë nëpër rrjetet sociale nga tifozët e Përfaqësueses së Zvicrës. Xhaka, Shaqiri, Behrami e Xhemaili do të përballen në 1/8 e finales në Kampionatin Botëror me Suedinë.
