“Kam frikë se disa të vërteta do të shkojnë së bashku me të nën tokë” , kështu shprehet vëllai i politikanit serb, Oliver Ivanoviç, të ekzekutuar sot në Mitrovicë.
Miroslav Ivanoviç ka folur pas tragjedisë dhe lajmit shokues që mori për vdekjen e të vëllait, duke e përshkuar atë si një njeri që nuk përhapte panik.
Gjatë një deklarate për Sputnik ku edhe konfirmoi vdekjen e Oliverit me pesë të shtëna, thotë se ai nuk e kishte marrë seriozisht kur makina e tij u vu në zjarr disa kohë më parë
Sipas tij, ai kishte edhe kërcënime të tjera, mirëpo ato nuk i ka bërë të ditura.
“Ai ishte i tillë. Oliver nuk ishte aspak ai tip që përhapte panik… Kam frikë se disa detaje të cilat mund të jenë e vërteta rreth vrasjes së tij do të shkojnë së bashku me të nën tokë. Ne nuk e dimë nëse gjatë kësaj kohe ai ka qenë i kërcënuar, nëse ka ndodhur diçka tjetër gjatë kësaj kohe, kjo pasi ai nuk ka folur asgjë. Por për çdo njeri të arsyeshëm, bazuar në të kaluarën e plotë të Oliverit dhe gjithçka që ka ndodhur më parë, mund të jetë e mjaftueshme për ta kuptuar. Unë nuk mendoj se duhet të ketë diçka tjetër për të thënë”, ka thënë Miroslav Ivanoviç.
