Kryeministri Edi Rama dhe, njëherësh, kreu i Partisë Socialiste do të zbresë ditën e nesërme me të rinjtë socialistë në sheshin ‘‘Skënderbej’. Përveç debatit në distancë me opozitën, Rama ka gjetur edhe kundërpërgjigjen e radhës.
Ashtu si Basha, i cili ka mbledhur simpatizantët dhe të rinjtë e Partisë Demokratike nën çadrën e vendosur prej dy muajsh para kryeministrisë, edhe Rama do t’i bëjë karshillëk kreut të opozitës, duke përdorur të rinjtë socialistë.
Megjithëse sheshi “Skënderbej” nuk është përfunduar ende, një pjesë e rrethimit do të hiqet, vetëm që të rinjtë socialistë të ulen aty dhe të diskutojnë me kryetarin e tyre.
Në këtë takim pritet që të ketë edhe votues për herë të parë që simpatizojnë Partinë Socialiste. Megjithëse ka plot ambiente të mbylluara dhe të hapura, ku mund të zhvillohen këto lloj aktivitetesh, Edi Rama ka zgjedhur të jetë afër çadrës, ndoshta edhe për arsye që mesazhet e tij të shkojnë direkt, dhe jo nëpërmjet ekranit.
