Para pak minutash, Lulzim Basha foli në çadër, ku përdori një gjuhë të ashpër ndaj kreut të KQZ-së, si dhe tha në mënyrë të prerë se PD nuk do të regjistrohet në KQZ.
Të njëjtin qëndrim mban edhe kreu i Partisë Republikane, Fatmir Mediu, i cili thirri në një mbledhje urgjente Asamblenë Kombëtare, për të dalë me një vendim unanim në prag të limiteve të fundit kohore, për regjistrimin në KQZ.
Në fjalën e tij, Mediu theksoi qëndrimin e kryesisë së partisë në lidhje me situatën që po kalon vendi:
“Qëndrimet e Partisë Republikane, por edhe të opozitës në tërësi, janë përtej vijës ndarëse me maxhorancën e inkriminuar dhe të korruptuar. Ne duhet të bëjmë cdo përpjekje që të ndalojmë influencën e parave të drogës në zgjedhjet parlamentare, në mënyrë që Rama të mbajë pushtetin falë bandave. Nuk duhet të qeverisin banditët dhe trafikantët, por qytetarët dhe ata duhet të shkojnë të votojnë të lirë dhe të qetë. Vetëm me zgjedhje të lira dhe të ndershme ne mund të pranohemi në familjen evropiane. Ne nuk mund të pranojmë asnjë zë që të na thotë se duhet të ulim kokën përpara pushtetit të Ramës dhe ta mbajmë atë në karrige për t’u tallur me shqiptarët.”
Në këtë takim morën pjesë edhe Jan Zahadril, Presidenti i Aleancës Konservatore dhe Reformiste Evropiane, Daniel Hannan, sekretar i përgjithshëm i Aleancës Kombëtare dhe Reformiste Evropiane, si dhe ish-kongresmeni Bob McEwen, tashmë, President i Këshillit për Politikat Kombëtare në SHBA.
Këta të fundit, në fjalën e tyre, theksuan se opozita duhet të bëjë çdo përpjekje që të ndalohet manipulimi i procesit zgjedhor, si dhe që shqiptarët meritojnë zgjedhje të lira dhe të ndershme.
Në përfundim të këtij takimi, të gjithë të pranishmit në Asamblenë Kombëtare, votuan në mënyrë unanime kundër regjistrimit të PR-së në KQZ për zgjedhjet.
