Besart Abdurahimi është lojtari më i ri në radhët e Partizanit dhe cilësohet si shpëtimtari i sulmit. 27-vjeçari ndodhet në hotelin e “demave” në këto momente dhe me shumë mundësi do të dale sot në stërvitje. Ai ka mbyllur gjithçka me klubin e kuq dhe odiseja për arritjen e marrëveshjes merr fund, më në fund!
Kush është Besart Abdurahimi? Ai është një investim po aq i rëndësishëm sa Edgar Çani. Në fillim të karrierës shihej si një talent shumë i madh. Formimin si futbollist profesionist e mori në Kroaci me skuadrën e të rinjve të NK Zagreb.
Abdurahimi meritoi thirrjen e kombëtares së Kroacisë U-21, madje luajti edhe 3 ndeshje. Në pritje të ftesës së Kombëtares së madhe që nuk erdhi kurrë, futbollisti gjeti “shërim” në Kombëtaren e Maqedonisë. Ai ishte pjesë e saj edhe në kualifikueset për Europianin e 2016-ës.
Pas 5 sezoneve me ekipin e Zagrebit, Abdurahimi u huazua te Hapoel Tel Aviv duke synuar një tjetër ligë të rëndësishme. 20 ndeshje në Izrael, 9 si titullarë, 4 gola të shënuar. Sulmuesi kalon nga NG Zagrebi te skuadra belge e Lokeren-it. 2 sezone në kampionatin belg, pa arritur të jetë kurrë titullar dhe dy huazime në vitin 2016. Astana për 4 muaj dhe Cerezo Osaka për 6 muaj.
Mbarimi i kontratës me Lokeren-in e solli te Shkëndija e Tetovës. Sulmuesi luan sezonin e pare si titullar, pasi koleksionon 15 ndeshje, 11 nga minuta e parë duke shënuar 3 gola. Pjesa e pare e këtij edicioni futbollistik e gjeti Abdurahimin si rezervë. Ai nuk u preferua asnjëherë në formacion dhe në 11 ndeshje që preku fushën mori vetëm 206 minuta. Tani vjen aventura e re me Partizanin. Të kuqtë shohin shpëtimin te ai, futbollisti shpreson të tregojë veten.
