U prit si “hero”, si njeriu që do të ndihmonte Partizanin që të fitonte kampionatin, por në të vërtetë e gjitha ishte një dështim i madh. Bëhet fjalë për ish-sulmuesin e kombëtares shqiptare, Edgar Çani, i cili ditën e sotme ka shkëputur zyrtarisht prishjen e kontratës, me të cilin më në fund ka gjetur mirëkuptimin.
29-vjeçari u bashkua një vit më parë me Partizanit, por dëmtimet e shumta bënë që ai të kalonte një vit shumë të dobët, ku luajti vetëm 500 minuta në Superiore dhe shënoi vetëm 2 gola. Një problem ishte që sulmuesi kishte një rrogë shumë të lartë për buxhetin e një ekipi shqiptar dhe kjo nuk mund të përballohej gjatë nga Partizani pasi mungoi pothuajse të gjithë sezonin. Para se Çani tu bashkohej ‘Të Kuqve’ vinte nga një dëmtim i gjatë dhe duket se nuk e kaloi kurrë edhe pse shprehu gatishmërinë për të luajtur me Partizanin.
Tashmë duket se shtatlarti është kënaqur, sepse është pranë akordit me Vibonezen në Serinë C italiane, ku do të tentojë të rikthehet ai i zakonshmi, me shpresën se do të luajë rregullisht dhe pa shqetësime fizike.
Me largimin e Çanit, Partizani mbetet vetëm me Hebajn në sulm, ndaj në ditët e ardhshme pritet edhe një përforcim, me shpresën se nuk do të jetë një operacion tjetër i dështuar, si ai me malazezin Stefan Nikoliç, i cili erdhi në Shqipëri dhe u largua pa shkelur mirë.
