Kryetari i Partisë Demokratike ka komentuar për herë të parë krijimin e një partie të re, lëvizje kjo e bërë së fundmi nga Patozi dhe Ridvan Bode.
I pyetur nga gazetarët nëse krijimi i kësaj partie të re nga demokratët e zhgënjyer do të përçante Partinë Demokratike, Basha tha se sulmet personale nga kafenetë nuk u vlejnë demokratëve dhe as shqiptarëve, ndërsa ftoi këdo që të kontribuonte për fuqizimin dhe ndërtimin e aksionit politik të PD-së.
Pyetja: Krijimi i një partie të re, a po rrezikohet përçarja e PD-së?
PD sapo ka përfunduar procesin e analizës. Është e drejta e çdokujt të bëjë zgjedhjen e tij politike. Pretendimi se propozimet nuk janë shqyrtuar nga kryetari, është pretekst. Nuk është kryetari, por forumet që shqyrtojnë propozimet. Çdokush është i ftuar të japë propozimet për fuqizimin dhe ndërtimin e aksionit tonë politik në PD. Sulmet ndaj kryetarit nuk janë ide politike dhe nuk u shërbejnë demokratëve që përballen me krimin, varfërinë, me largimin nga puna… PD do vijojë të luftojë kudër kapjes nga krimi e droga. Nuk vlejnë sulmet personale nga kafenetë dhe as deklaratat e supozuara.
U bëj ftesë të gjithëve të bashkohet rreth vlerave tona në një proces të hapur, modern dhe evropian nga e cila PD do ndërtojë alternativën e transformimit të madh politik të vendit.
Si do e bashkoni partinë?
I di shumë mirë përgjegjësitë e mia, bashkimi nuk bëhet si negociata personale të kryetarit. TIRANA TODAY
