Agjencia “Tirana Parking” ka shitur 145 370 bileta për 3-mujorin e dytë të vitit, në 10 sheshet ku janë vendosur vendparkimet.
Numri më i lartë i biletave është shitur gjatë muajit qershor, që përkon me hapjen e dy vendparkimeve të reja: atij të sheshit ‘Skënderbej’ dhe Bulevardit të Ri, duke rritur edhe më shumë të ardhurat për Bashkinë.
Vetëm gjatë këtij muaji, në sheshin Skënderbej janë shitur 17.128 bileta, çka do të thotë se minimalisht janë arkëtuar rreth 3.4 milion lekë, nëse kemi parasysh se 0-3 orë qëndrimi në këtë shesh kushton 200 lekë. Për sa i përket të ardhurave për 3-mujorin e dytë rezulton se minimalisht janë arkëtuar edhe 14.3 milion lekë nga 8 sheshet e tjerë, ku një orë qëndrimin kushton 100 lekë.
Numri i biletave të shitura rezulton të jetë rritur në raport me tremujorin e parë, duke qenë se për periudhën janar-mars, kompania Tirana Parking raportoi 95.263 bileta të shitura, apo rreth 50 mijë bileta më pak se 3-mujori i dytë.
Kapaciteti i vendparkimeve Publike në total është 24000 vende. Tirana ndahet në 4 zona Administrimi për Parkim dhe 3 zona tarifore.
