Një ditë pas deklaratave të forta të bëra nga ambasadori amerikan në vendin tonë, Donald Lu, lidhur me vendimin që do të merret për ish- ministrin e brendshëm, Tahiri, vjen reagimi i avokatit Maks Haxhia.
“Ishte e rëndësishme se atë mesazh e ndava në dy pjesë, ne mesazhin e qarkullimit të opinioneve, ndodh rëndom në vend kur ka cështje pikante, që të dyja palët, përdorin metoda të tilla, ose hapin fjalë që qarkullon presion ose para. Veçoj mesazhin e Lu që gjykata duhet të gjykojë në prova dhe në ligj, dhe sot Tahirit duhet ti hiqet masa e arrestit të shtëpisë”- tha ai para nisjes se seancës.
Mesazhi i Lu
Ndërsa një ditë para se Gjykata të vendosë per Tahirin, reaguai ambasadori amerikan Donald Lu, i cili me një deklaratë të fortë kërkon që vendimi duhet të bazohet në prova dhe jo në presione.
Ndërsa shton se ka disa raportime për presione serioze mbi këtë çështje dhe ryshfete që u janë ofruar gjyqtarëve. Gjatë një prononcimi, Donald Lu i ka bërë thirrje shoqërisë civile dhe medias që ta vëzhgojnë këtë çështje me vëmendje.
“Kemi dëgjuar disa raportime nga burime të pavarura për presione serioze në këtë çështje, përfshirë edhe ryshfete që u janë ofruar gjykatësve. Ne i bëjmë thirrje shoqërisë civile dhe medias që ta vëzhgojnë këtë çështje me vëmendje, në mënyrë që vendimi të bazohet mbi provat dhe ligjin dhe jo mbi presione, kërcënime apo para. Askush nuk është mbi ligjin”, u shpreh Donald Lu.
Gjykata e Krimeve të Rënda ka caktuar më 12 maj 2018, masën e sigurisë “arrest shtëpie” ndaj ish-ministrit të Brendshëm, Saimir Tahiri, të akuzuar si të përfshirë në trafik droge me grupin Habilaj. Vendimi i Gjykatës urdhëron Tahirin të mos largohet nga banesa e tij që ndodhet në Tiranë, te rruga “Kodra e Diellit”.
