Papa Françesku ka mbajtur një fjalim të premten, ku u kërkoi priftërinjve që kanë abuzuar seksualisht me fëmijët që të dorëzohen.
“Dorëzojuni drejtësisë njerëzore dhe përgatituni për drejtësi hyjnore”, tha Papa gjatë fjalimit të tij në Vatikan.
“Është e pamohueshme që disa në të kaluarën, nga papërgjegjshmëria, mosbesimi, mungesa e trajnimit e eksperiencës apo dritëshkurtësia morale e shpirtërore i trajtuan shumë raste pa seriozitetin dhe gatishmërinë që duhej. Kjo nuk duhet të ndodhë më kurrë,”– tha Papa Françesku.
Vitet e fundit janë zbuluar disa skandale që kanë tronditur kishën katolike teksa priftërinjtë kanë abuzuar seksualisht me të miturit.
Udhëheqësi i më shumë se një miliard katolikëve në botë, tha se priftërinjtë abuzues kanë kryer akte të neveritshme, por vazhdojnë të ushtrojnë shërbimin e tyre sikur të mos kishin ndodhur asgjë.
“Ata nuk kanë frikë nga Zoti apo gjykimi i tij, por vetëm nëse zbulohen apo demaskohen.”
Në muajin shkurt të vitit të vjen në Vatikan do të mbahet një konferencë rreth krizës së abuzimit seksual, me pjesëmarrjen e peshkopëve, udhëheqësve të organizatave fetare si dhe ekspertëve, raporton BW.
Disa prej viktima shpresojnë që konferenca të hartojë më në fund një politikë të qartë, me qëllimin për t’i vendosur peshkopët përpara përgjegjësisë për trajtimin e pakujdesshëm të rasteve të abuzimit seksual.
