Trajneri i Kombëtares Shqiptare, Christian Panucci ka dalë në një konferencë për mediat, së bashku me kapitenin Mërgim Mavraj, pas humbjes turpëruese 0-4 ndaj Skocisë.
Teksa së fundmi janë përhapur fjalë për largimin e italianit, ky i fundit deklaroi se të ardhmen e tij si trajner e ka në dorë Duka, ndërsa hoqi çdo përgjegjësi nga vetja lidhur me humbjet.
“Duhet të pyesni Dukën për të ardhmen time si trajner. Jam papërgjegjësi kryesor për situatën në Kombëtare. Me grupin e plotë mund të shkojmë në Europian.
Më dhemb shpirti kur dëgjoj fjalët për largimin e trajnerit. Nuk është përgjegjësia e trajnerit, ajo që ka ndodhur. Nuk ka asnjë egoizëm brenda Kombëtares, faktorët e jashtëm nuk na ndikojnë aspak. Ekipit Kombëtar i mungojnë 6-7 lojtarë, askujt s’i intereson. Nuk jam idiot, duhet të ndryshojmë. Jam shumë i lumtur që jam pjesë e Shqipërisë. Kam një kontratë deri në vitin 2019, unë nuk dorëzohem”, shtoi Panuçi.
Ndërkohë, kapiteni Mavraj kërkoi sërish falje lidhur me gjestin e tij, që e bëri të dalë jashtë fushës me karton të kuq.
“Të gjithë kemi përgjegjësi për situatën ku ndodhemi. Unë i kam kërkuar falje ekipit për kartonin e kuq. Presim kthesën në miqësoren ndaj Uellsit”, tha Mavaraj.
