Kombëtarja shqiptare duhet ti bëjë llogaritë për dy miqësoret e radhës përballë Kosovës dhe Ukrainës pa gardianin e portës së Lazios, Thomas Strakosha. Ai po vuan një lëndim të marrë në javët e fundit të kampionatit dhe në ndeshjen përballë Interit ka luajtur i dëmtuar, duke rrezikuar shumë pasi qëndronte në këmbë me injeksione.
Tani trajneri Christian Panucci nuk ka ndërmend të rrezikojë, pasi bëhet fjalë për dy miqësore ku më shumë do të shihen elemente të reja, ndërkohë që Strakosha është i afirmuar. Zëvendësi i Strakoshës është një surprizë, por jo dhe aq e madhe: i përzgjedhuri është kapiteni i Laçit, Gentian Selmani.
Vetëm 20 vjeç, portieri i kurbinasve po zhvillon një sezon fantastik dhe tashmë është një veteran të Laçi, duke qenë ndër më të mirët e kampionatit shqiptar këto vitet e fundit. Tani vjen edhe shpërblimi për punën e shkëlqyer, ndërkohë që në sfidën kundër Kosovës priten minuta për të, edhe për faktin se në stadium do të jenë të pranishëm shumë menaxherë.
