Shqipëria pësoi dy humbje shokuese në dy ndeshjet e fundit miqësore përballë Kosovës dhe Ukrainës, por duket se kjo nuk e ka shqetësuar shumë trajnerin Christian Panucci. Ky i fundit braktisi konferencën për mediat pas ndeshjes me Ukrainën dhe duket se e paska pasur me nxitim drejt Spanjës, pasi e priste një ndeshje golfi me disa legjenda të futbollit në turneun “Costa Brava”.
Nëse mendonit se trajneri i kuqezinjve ka kaluar ditët duke menduar si të sigurojë “kthesën” e kuqezinjve në shtator, gaboheni rëndë, pasi në momentin kur FSHF publikoi intervistën e famshme në italisht të trajnerit ku fliste për “luftëtarët” dhe mungesën e dëshirës apo impenjimit, në fakt ai ishte në Spanjë, duke u prezantuar në turneun e legjendave të futbollit.
Mes shumë legjendave, Panucci binte në sy mes Gabriel Batisutës, Patrik Klaivert, Endi Cole dhe Pep Guardiola. Gjatë intervistë trajneri i kombëtares shqiptare nuk nguroi ti jepte “mend” edhe presidentit të Real Madridit për pasuesin e Zidane, duke i këshilluar të firmoste me Allegrin, Pochettinon apo Klopp.
Ndër të tjera, kur u pyet se çfarë do të bënte nëse Florentino Perez do e telefononte për të drejtuar Realin, Panucci u përgjigj me shaka: “Do ishte ëndërr të drejtoja Realin, por të jemi me këmbë në tokë, kjo është një ëndërr.”
