Panuçi ka replikuar me njërin nga gazetarët në fillim të konferencës së sotme për shtyp rreth paraqitjes që ka bërë Shqipëria në dy ndeshjet me Spanjën. Me këtë rast ai ka bërë një krahasim për të dyja ndeshjet dhe ajo që u luajt në Shkodër në drejtimin e De Biasit ishte më e dobët. Në një farë mënyre Panuçi lëshon një mesazh se ka ndërtuar një ekip më të mirë se ai që kishte gjetur kur erdhi.
Gazetari: Do të shohim një Shqipëri më kurajoze ndaj Italisë apo që mbron dhe e bazon gjithçka te kundërsulmi?
Panuçi pyet gazetarin: Si ishte Shqipëria në Spanjë?
Gazetari: Në pjesën e dytë ishte shumë mirë.
Panuçi: Kur luajtëm me Spanjën këtu në Shqipëri, sa herë e goditët portën?
Gazetari: Në ndeshjen e parë Shqipëria nuk e kaloi mesin e fushës.
Panuçi: Po në ndeshjen e fundit, sa herë e goditëm portën në Spanjë?
Gazetari: Janë dy ndeshje të ndryshme.
Panuçi: Pse ishin të ndryshme, se luajtëm në mbrojtje?
Gazetari: OK, por pësuat tre gola që në pjesën e parë në Spanjë…
Panuçi: E di cila është skuadra që ka goditur më shumë portën e Spanjës në këto eliminatore? Bëmë 14 raste të rrezikshme dhe gjuajtëm 7 herë portën. Vetëm se u mbrojtëm me tre lojtarë. Sa skuadra kanë luajtur mirë në Spanjë? Po ua them unë, zero. Kjo është përgjigjia ime.
