Kreu i grupit parlamentar të Partisë Demokratike, Edi Paloka, duke folur nga çadra e protestës, theksoi se vendi është i kapur nga krimi dhe trafikantët e kultivimit të kanabisit.
Ndërsa akuzoi kryeministrin Rama se ka blerë edhe diplomatët e huaj që ta mbështesin në keqqeverisjen e tij.
“Pavarësisht se nuk ka hequr dorë nga arroganca, nga sjellja e tij prej injoranti politik prej arroganti, sot ai është më i vetmuar se kurrë dhe për këtë arsye po përpiqet të blejë dhe korruptojë aleatë brenda dhe jashtë Shqipërisë. Policia italiane sekuestron 2 tonë marijuanë në një furgon në Itali. Po dje, policia italiane shkatërron një grup shqiptarësh në Katanja. Kjo është një situatë kriminalizimi, çdo ditë krim, atentate. Siç ishte dhe ai i vrasjes së komisar Artan Cuku. Dhe pastaj flet për mediat kazani. Edi Rama jo vetëm që e la në dorë të krimit, por edhe e nxori në pritë për krimin, sepse është i lidhur me krimin, ata janë e vetmja shpresë për të dhe pastaj flet për media kazani për ndërkombëtarë që luftojnë atë ndërkohë që me paturpësi ka arritur deri aty sa me paratë e drogës, me lidhjet mafioze të tentojë të korruptojë edhe të huajt. Ne atë sallën që e quajnë parlament, por nuk ka asnjë të përbashkët, vazhdon sot e kësaj dite të punohet kundër interesave të shqiptarëve…”, – tha Paloka.
