Kryetari i grupit parlamentar të Partisë Demokratike, Edi Paloka, e cilëson procedimin penal ndaj tij, kryetarit Basha dhe një numri deputetësh të kësaj force politike, si të motivuar politikisht.
Në një prononcim për “Tirana Today”, Paloka thekson se Partia Demokratike ka ndjekur të gjitha procedurat ligjore për zhvillimin e protestës së opozitës gjatë ditës së djeshme.
Paloka shpjegon se ky është një argument më shumë përse opozita këmbëngul në krijimin e një qeverie teknike, pasi me mazhorancën aktuale nuk mund të zhvillohen zgjedhje me standarde.
“Për protesta ligji është i qartë, nuk merret leje, por thjesht njoftohet policia. Policia po shërben politikisht, siç ka bërë këto katër vite të “Rilindjes”, një argument më shumë për të kuptuar se përse nuk mund të ketë zgjedhje me këtë qeveri”, u shpreh Paloka për Tirana Today.
Pak orë më parë, policia e shtetit procedoi penalisht disa deputetë të Partisë Demokratike dhe kreun e saj, Lulzim Basha.
Sipas policisë, procedimi u krye për shkak të tubimit të paligjshëm nga ana e deputetëve të opozitës dhe mbështetësve të saj, duke bllokuar për rreth 1 orë qarkullimin rrugor, në 5 pika kryesore të vendit.
