Kolonel Myslim Pashaj tha sot se në vitin 2009 humbëm 354 km2 dhe se ky gabim nuk duhet të përsëritet më sot. I ftuar në “45 minuta” në “Report Tv”, Pashaj deklaroi se Greqia i kishte marrë një sipërfaqe të konsiderueshme Shqipërisë nga marrëveshje e 2009-tës.
Koloneli kujton se ishte e paharruar nata kur Gjykata Kushtetuese përmbysi marrëveshjen e 2009-tës. Kujtojmë së kolonel Pashaj ishte ai që denoncoi marrëveshjen e Detit me Greqinë në vitin 2009
“Këtë pyetje ma ka bërë edhe Sali Berisha ku janë 354 km2. Ishte Gjykata Kushtetuese që përmbysi atë marrëveshje dhe ajo natë ka qenë e paharruar për ne. Një nga anëtarët e Gjykatës Kushtetuese bëri pyetjen, a e keni parë testin e përpjesëtueshmërisë që ligji i detit ua thotë të dy palëve, që brigjet tuaja kanë fituar aq det sa iu takon apo jo, pra duhen matur gjatësia e brigjeve shqiptare dhe atyre të arqipelagut. Dhe, ne kishim 139 km vijë bregdetare, ndërsa Greqia në arqipelagun e Korfuzit kishte vetëm 86 km dhe kur iu ndanë Shqipërisë i kishte rënë për një 1 km vijë tokësore, ishin 10 km ujë, ndërsa Greqisë për një 1 km tokë, i kishte rënë 17.9 km2 vijë bregdetare. Dhe përgjigja ishte e tmerrshme, nuk e kemi bërë matjen,” deklaroi Pashaj .
Pashaj thekson se rëndësi ka që kjo punë filloi, për kauzën e madhe, nuk është kauza tij, por është kauza e vërtetësisë. Ai shprehet se ka një gëzim të madh që bisedimet rifilluan.
“Ne i kemi të domosdoshme marrëdhëniet fqinjësore për Shqipërinë, por duhet të them edhe një të vërtetë të madhe, që çështjen e Detit e kemi hapur ne vetë, jemi ne fajtorë, dhe ata thonë nëse ju nuk dini të luftoni, ne nuk kemi faj. Jam i sigurt që ekipi negociator ka tashmë një përvojë të madhe. Secili person negociator, ka pas institucionin e tij. Unë ende i bëj llogaritë me hartat greke, akoma nuk kam një hartë detare shqiptare,” tha Pashaj.
