Nuk harrohet momenti kur Kuvendi i Kosovës arriti të ratifikojë marrëveshjen e demarkacionit me Malin e Zi me 80 vota pro, 11 kundër dhe asnjë abstenim.
Kjo marrëveshje është votuar pas katër tentimeve për pengim që i bëri Vetëvendosje me hedhjen e gazit lotsjellës. Në atë kohë u tha se marrëveshja do të sillte menjëherë liberalizimin e vizave për kosovarët. Por ky liberalizim akoma nuk ka ardhur, madje në Parlamentin Evropian nuk ka ardhur ndonjë dokument për t’u votuar për liberalizimin e vizave për Kosovë, ka deklaruar zëvendëspresidenti i Parlamentit Evropian, Rainer Wieland.
Gjithashtu për këtë ka reaguar deputetja e Lëvizjes Vetëvendosje, Fitore Pacolli-Dalipi, në një prononcim për “Bota sot”, ka thënë se përderisa Lëvizja Vetëvendosje vazhdimisht ka bërë thirrje për korrigjim të demarkacionit dhe pastaj votim të tij, qeverisë i ngutej të falte token ndonëse kishte punuar shumë pak në plotësimin e kushtit themelor, atë të luftimit të korrupsionit dhe krimit të organizuar.
“Ka qenë e qartë që nga fillimi se Kosova duhet të plotësoj të dy kushtet themelore, atë të demarkacionit me Malin e Zi dhe kushtin për luftimin e korrupsionit dhe krimit të organizuar. Për derisa, Lëvizja Vetëvendosje i ftonte deputetet dhe qeverinë të përmirësonim se pari gabimet e bëra nga Komisioni i Murat Mehes të cilat u dokumentuan dhe u arsyetuan shumë mirë nga Komisioni i eksperteve i udhëhequr nga Bulliqi, dhe pastaj ta ratifikonim në Kuvend, qeverisë i ngutej të falte token ndonëse kishte punuar shume pak në plotësimin e kushtit themelor atë të luftimit të korrupsionit dhe krimit të organizuar. Ndërsa tani në vend punojnë intenzivisht për të luftuar krimin dhe korrupsionin qeveria jep premtime me data të pa sakta. Kjo nuk është ndonjë gjë e re. Që nga viti 2009 qeveritë kanë dhënë premtime të tilla sa i përket liberalizmit të vizave dhe kështu kane manipuluar dhe gënjyer qytetarët e Kosovës”, ka deklaruar Pacolli.
