Orkestra Simfonike të Radio Relevizionit Shqiptar, (RTSH), u vlerësua me dekoratën “Nderi i Kombit” nga Presidenti i Republikës, Bujar Nishani, në 55-vjetorin e themelimit të saj.
Në ceremoninë e këtij aktiviteti jubilar, sekretari i përgjithshëm i Presidencës, Florian Nuri, i dorëzoi mbrëmë Orkestrës së RTSH-së, dekoratën “Nderi i Kombit”, për “kontributin e çmuar dhe të padiskutueshëm të këtij formacioni të madh muzikor me interpretimet e shkëlqyera për më shumë se gjysmë shekulli, duke pasur një ndikim të jashtëzakonshëm, të ndjeshëm dhe të patjetërsueshëm në zhvillimin muzikor në mbarë vendin si dhe duke mundësuar zhvillimin kulturor të popullit shqiptar”.
Gjithashtu, Presidenti i Republikës vlerësoi me dekoratën “Nderi i Kombit”, Ferdinand Dedën (pas vdekjes) dhe Eno Koçon, për kontributin e paçmuar si dirigjent të orketrës së RTSH-së.
Data 16 maj i vitit 1962 është dhe do të mbetet një nga data më të shënuara në historinë e Radio Televizionit Shqiptar, pasi ajo lidhet me krijimin e formacionit orkestral më të madh të kohës, Orkestrën Simfonike të Radios dhe Kinematografisë siç quhej në atë kohë, dhe Orkestrës Simfonike të RTSH siç njihet sot.
Koncerti i parë u realizua më 20 gusht të po atij viti nën dirigjimin e Mustafa Krantjes dhe u luajtën vepra të Haydn, Mendelssohn dhe Mozart.
