Opozita shqiptare nisi sot atë që e quan mosbindje civile.
Qytetarët e rretheve të ndryshme të vendit bllokuan pikat kryesore të qarkullimit rrugor.
Partia Demokratike caktoi nga një përgjegjës të saj për secilin pikë që do të bllokohej.
Në rrethrrotullimin e Plugut të Lushnjës u caktua Arben Ristani; në rrethrrotullimin e Rrugës së Kombit në Milot, Aldo Bumçi; në rrethrrotullimin e Bradasheshit në Elbasan, Edmond Spaho; në kryqëzimin e Teknologjikut në Tiranë, Flamur Noka dhe në rrethrrotullimin “Shqiponja”, po në Tiranë, Edi Paloka.
Në orën 11:00 të paradites së sotme, në rrethrrotullimin “Shqiponja”, u mblodhën protestues nga rrethe të ndryshme të vendit. Atyre iu bashkua edhe kreu i Partisë Demokratike, Lulzim Basha.
Në shenjë proteste, Basha së bashku me mbështetësit e tij u ulën këmbëkryq duke bllokuar të gjithë trafikun. Për rreth 30 minuta, lideri i Partisë Demokratike dëgjoi thirrjet e protestuesve për largimin e kryeministrit Edi Rama dhe shqetësimin e tyre mbi kriminalizimin e vendit nga kultivimi dhe trafikimi i drogës.
Pak minuta nga përmbyllja e protestës, kreu i Partisë Demokratike iu drejtua protestuesve, duke theksuar se opozita nuk do t’ia dorëzojë Shqipërinë, krimit dhe drogës. Sipas Bashës, vetëm qeveria teknike është alternativa për të pasur zgjedhje të lira dhe të ndershme.
“Jemi të bashkuar në këtë lëvizje kombëtare dhe evropiane, të bashkuar në vendosmërinë tonë për të mos ia dorëzuar Shqipërinë, krimit dhe drogës, për të mos ia dorëzuar lirinë tonë, tiranisë së korrupsionit dhe të krimit në pushtet, por të përbashkuar, siç jemi bashkuar, qindra mijëra shqiptarë, miliona shqiptarë nga jugu në veri nga lindja në perëndim; për zgjedhje të lira dhe të ndershme, me një qeveri teknike, e cila do të largojë kriminelët nga institucionet, sipas ligjit të dekriminalizimit, që do të luftojë me të vërtetë drogën dhe paratë e drogës, që do të krijojë kushtet për zgjedhje të lira dhe të ndershme, përfshirë votimin biometrik dhe numërimin elektronik të votës së çdo shqiptari e çdo shqiptareje dhe, menjëherë pas kësaj, votimin dhe zbatimin e vetingut dhe reformës në drejtësi, sipas përcaktimeve kushtetuese dhe marrëveshjes politike të 22 korrikut. Zoti i bekoftë shqiptarët për këtë sakrificë dhe këtë qëndresë. Ky është një paralajmërim se vendosmëria e kësaj lëvizje popullore, e këtij bashkimi qytetar është e pathyeshme për realizimin e zgjedhjeve të lira dhe të ndershme. Ju ftoj ta përmbyllim këtë protestë duke u larguar me qetësi dhe paqe, pa asnjë provokim, dhe pa iu përgjigjur asnjë provokimi”, u shpreh Basha.
Protesta u përmbyll me këndimin e himnit kombëtar dhe me zhbllokimin e trafikut. Protestuesit marshuan qetësisht drejt qendrës së Tiranës për t’u ndalur në çadrën e ngritur nga opozita përpara Kryeministrisë.
[ngg_images source=”galleries” container_ids=”59″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]