Kryeministri i Greqisë Alexis Tsipras iu nënshtrua sot një ndërhyrje kirurgjikale, e cila rezultoi e suksesshme.
Sipas njoftimit të Kryeministrisë, operacioni zgjati 30 minuta ndërsa ndërhyrja u bë nga Dhimitris Theodorou, një nga kirurgët më të mirë në Greqi.
Kryeministri Tsipras u shtrua në spitalin “Eugenidio” pasditen e sotme rreth orës 15:00 për shkak të një sëmundje në kërthizë të quajtur hernia umbilikale.
Në vizitën e tij që i kreu në spital, ministri i Shëndetësisë, falënderoi stafin mjekësor që asistoi gjatë ndërhyrjes kirurgjikale.
Ndërsa mësohet se shefi i qeverisë greke është në gjendje të mirë shëndetësore dhe pritet që të qëndrojë në spital edhe gjatë 24 orëve të ardhshme, para se t’u rikthehet detyrave kryeministrore.
Çfarë është hernia kërthizore?
Hernia kërthizore është sëmundje gjatë së cilës dëmtohet muri i barkut pranë zonës së kërthizës. Mund të shkaktojë fryrje të jashtme te barkut, ose herë pas here fryrje të zorrëve të holla.
Xhunga e krijuar shpesh shtypet dhe shkakton dhimbje të forta. Trajtimi është vetëm kirurgjikal.
Hernia kërthizore është e pranishme tek bebet, për shkak të lidhjes që ato kanë me kordonin e nënës së tyre. Megjithatë në moshën 2 ose 3 vjeç, natyrshëm hernia zhduket.
Hernia jo gjithnjë shfaqet si një xhungë, ajo mund të duket edhe vetëm si një fryrje e kërthizës. Simptomat duken qartë kur muret e barkut shkaktojnë presion mbi të. Kjo rezulton në dhimbje barku. Këto simptoma mund të përkeqësohen duke shkaktuar këputje dhe lodhje.
