Drejtori i përgjithshëm i Partizani, Olsi Rama, në një prononcim për mediat ka sqaruar situatën në të cilën ndodhet ekipi pas merkatos së janarit. Po ashtu ka konfirmuar se Realdo Fili ka kërkuar largimin për shkak të minutazhit të pakët, por gjithashtu është shprehur se ai është një lojtarë që është në planet e Partizanit dhe vetën më huazim mund të jepet.
Partizani e nisi me humbje?
Kemi pësuar një humbje në Vlorë si rezultat i një 11 metërshi të akorduar në minutën e fundit të kohës shtesë. Mendoj se në përballjen e luajtur ndaj Flamurtarit ekipi ka zbatuar mjaft mirë detyrat taktike të dhëna nga trajneri . Në këtë fazë ku jemi për ne është mjaft e rëndësishme që skuadra të bëjë paraqitje të tilla, për më tepër që ndaj Flamurtarit nuk kishim në dispozicion disa prej lojtarëve të afruar gjatë merkatos së janarit.
A mund të konsiderohet e përfunduar merkato e Partizanit?
Po mund ta konsideroj të përfunduar, jemi mjaft të kënaqur me elementët që kemi afruar në ekip. Kemi rritur cilësitë teknike e fizike të skuadrës dhe mendoj se kemi goditur aty ku ishte e nevojshme përforcimi i skuadrës.
Komenti juaj në lidhje më çështjen Fili?
Është pozitive kur në ekip ka konkurrencë , Fili është lojtar i Partizanit. Ne prej disa kohësh kemi diskutuar edhe me menaxherin e tij mbi mundësitë që lojtari të ketë për të luajtur, pasi ka nevojë që të aktivizohet , duhet të fitoj besimin në aftësitë e tij. Ne e kemi konsideruar pjesë të Partizanit dhe prandaj kemi sugjeruar edhe një formë huazimi , që të kishim mundësi të shikonim edhe potenticialin e lojtarit. Fili nuk është i larguar kemi akoma për të biseduar . Çështja është që tek Partizani duhet të qëndrojnë vetëm lojtarët që kanë dëshirë të japin për skuadrën maksimumin e tyre. Besoj që fanella e Partizanit është e nderuar dhe e respektuar dhe e meriton që ti kthehet në këtë mënyrë respekti. Ne kemi afruar lojtarë përgjatë merkatos , normal që një lojtar si Fili ndihet disi në trysni , por është zgjedhja teknike e trajnerit se cilët lojtar do të aktivizoj në fushë.
Sot është përfolur se ndoshta Starova mund të mos jetë deri në fund të sezonit në drejtimin e skuadrës?
Këto lajme i lexova edhe unë në gazeta , nuk ka asgjë të vërtetë.
