Shqiptarët po plaken shpejt dhe në pak dekada, mesatarja e moshës do të jetë rreth 50. Kështu, Shqipëria nuk do të jetë më një vend që simbolizon moshën e re të popullsisë së saj. Aktualisht, mosha mesatare në vend është 37, raporton Agjencia e Pavarur e Lajmeve në Balkan.
Ky parashikim shqetësues është bërë nga ekspertë të Organizatës së Kombeve të Bashkuara, sipas së cilës plakja e popullsisë dhe emigracioni do të çojnë moshën mesatare të popullsisë në vitin 2060 në 48.
Në këtë aspekt, Shqipëria do të bëhet njësoj si vende si Spanja, Italia, Portugalia, Gjermania, Polonia, Bosnja dhe Kroacia.
Sipas Kombeve të Bashkuara, shkaku që po ndikon në plakjen e popullsisë lidhet me uljen e numrit të lindjeve, me arsyet ekonomike dhe me sfidat demografike, si emigrimi.
Ndërkohë, një studim i mëparshëm i Organizatës së Kombeve të Bashkuara fliste për ulje drastike të popullsisë shqiptare. Sipas këtij studimi, në 2100, popullsia e Shqipërisë do të jetë 1,7 milion me një rënie prej 1,2 milion nga popullsia aktuale që është 2,9 milion./ Tirana Today
LEXO EDHE – RAPORTI ALARMUES: BIE NDJESHËM NUMRI I MARTESAVE NË SHQIPËRI
LEXO EDHE – RAPORTI/SHQIPTARËT NË KRYE TË LISTËS SË AZILKËRKUESVE. 89 % PREJ TYRE PRESIN PËRGJIGJE
LEXO EDHE – RAPORTI/ SHQIPËRIA PO PLAKET, BIE NUMRI I LINDJEVE ME 15,4%
