Gino Ramadani dhe gruaja e tij, Elvira, u bënë të famshëm para pak kohësh, për shkak të bamirësisë së tyre. Çifti shqiptar hapi një piceri në Zvicër, ku ofruan ushqim falas për personat që nuk kishin mundësi ta blinin atë me para.
Një rast i rrallë ky që habiti mijëra njerëz, ndër ta edhe biznesmenë.
“Nëse ke uri dhe nuk ke mundësi të paguash, atëherë mund të merrni një picë pa pagesë. Paratë mund t’i ktheni më vonë, por edhe nëse s’keni mundësi, atëherë nuk ka nevojë t’i ktheni- askush nuk duhet të qëndrojë i uritur”, ishte ky njoftimi në picerinë e shqiptarit, por duket se gjërat nuk kanë shkuar ashtu siç Gino kishte menduar.
Kjo sepse shumë persona e kanë shfrytëzuar dhe keqpërdorur mundësinë që shqiptari ofroi për të varfrit.
“Shumë persona e kanë keqpërdorur misionin tonë. Disa ishin bile të pacipë. Kishte persona që nuk u nevojitej realisht, por që porositnin një ëmbëlsirë ose raki gratis”, thotë Ramadani.
Pavarësisht kësaj, shqiptari shprehet se nuk është penduar për veprimin e tij, pavarësisht dështimit të nismës bujare, por është mjaft bujar.
“Jam krenar që në restorantin tim kanë ngrënë gratis mbi 3000 persona,” vijon 40 vjeçari, i cili për këtë ka “humbur” 60.000 franga zvicerane.
Por, çfarë do ndodhë tani me restorantin e çiftit shqiptar? Ata kanë gjetur një qiramarrës tjetër që do e mbajë lokalin në të ardhmen.
“Restoranti është në duart e sigurta”, ka thënë Ramadani.
