Revanshi mes Tony Bellew dhe David Haye, në rangun e peshave të rënda do të zhvillohet në 5 maj të vitit 2018. Lajmin e ka konfirmuar Eddie Hearn, që po merret me organizimin e kësaj sfide e cila do të zhvillohet në Londër, në stadiumin “O2 Arena”.
Ishte programuar që kjo përballje të zhvillohej në 17 dhjetor të këtij viti, por pasi ish kampioni i peshave të rënda Haye u dëmtua në krahun e majtë, duke detyruar organizatorët të anulonin sfidën. Sfida e parë mes dy boksierëve u zhvillua më 4 mars 2017, me Bellew që fitoi me “KO teknik” në raundin e 11-të, përballje ku Haye u dëmtua në “Thembrën e Akilit” dhe më pas u operua. Dy boksierët nisën menjëherë bisedimet për revanshin, duke rënë dakord për 17 dhjetorin, por dëmtimi i ish-kampionit të botës solli fillimisht anulimin e sfidës dhe sot vjen lajmi se revanshi do të zhvillohet më 5 maj të 2018-ës.
Nuk dihet nëse gjatë kësaj periudhe Bellew do të zhvillojë një përballje tjetër apo do të qëndrojë pushim deri në maj. “Tani kam një plan të qartë për të ardhmen. Jam i lumtur që më në fund kam një datë dhe do t’u jap fansave të mi një tjetër kënaqësi më 5 maj. Doja që këtë fitore ta arrija në dhjetor, por tani do të festoj Krishtlindjet me familjen time”, tha Bellew.“Në 5 vitet e fundit kam anuluar disa duele për shkak të dëmtimeve, por kjo më ka mësuar të rritem dhe kthehem më i fortë. Dhe si rezultat i bisedimeve vjen 5 maji, ku unë do të jem gati për t’u përballur, ku ne do t’u dhurojmë fansave një përballje të madhe. Në 2018-ën do të rikthehem dhe do t’u jap fansave duelin tim më të madh, në një mbrëmje që ata do ta mbajnë mend gjatë”, tha David Haye për fansat.
