Armand Duka ka zyrtarizuar kandidaturën e tij për president të Federatës Shqiptare të Futbollit. Kështu, ai kërkon të marrë një mandat të pestë të federatës në zgjedhjet që do të mbahen më 7 shkurt.
“Rikandidoj pas konsultimeve me grupe interesi. Jam i bindur për të vazhduar rrugën me të gjithë ju, rruga e pashmangshme na ka çuar te progresi. Jam në dispozicion të anëtarëve të Asamblesë Zgjedhore”, tha Duka ndër të tjera.
Ai mund të ketë përballë deputetin socialist Bashkim Fino, i cili pritet të zyrtarizojë sot kandidaturën e tij.
Ndërkohë, zgjedhjet brenda FSHF-së janë kundërshtuar haptazi nga administratori i ekipit të Flamurtarit, Sinan Idrizi, i cili thotë se kreu i FSHF-së, Armand Duka po lejon manipulimin e tyre.
Në një intervistë për Tirana Today, Idrizi shprehet se problemi është mjaft i rëndë, teksa po cenohet demokracia dhe sipas tij, këto zgjedhje nuk kanë asnjë vlerë, teksa në votime do të marrin pjesë shoqata të palicencuara.
I pyetur lidhur me situatën në pritje të zgjedhjeve për kreun e FSHF-së, Idrizi shprehet:
Nëse bëhet fjalë për të hyrë në një sistem të ndershëm votimesh dhe shikojmë se një pjesë më e madhe e këtyre që do të votojnë nuk kanë lidhje me votimin, atëherë për çfarë të flasim?
Por këtu nuk flasim për një gabim njerëzor, flasim për një sistem që ka një problem shumë thelbësor. Këtu është problemi dhe këtë duhet të shpjegojnë këta.
Dhe unë nuk e kuptoj, vini re, faqja e parë e gazetës sportive nuk merret me këtë punë, por merret me batutën e Facebook-ut të dikujt.
Ku konsiston manipulimi i procesit zgjedhor, duke qenë se Fino nesër zyrtarizohet si kandidat për kreun e FSHF-së?
Mos u merrni me emrat e përveçëm. Këtu ka një asamble që organizon zgjedhjet, ka një kryetar të federatës shqiptare që është përgjegjës për këtë. Për ta thënë më thjesht, është si një qeveri që bëhet gati për përgatitjen e zgjedhjeve politike në një zonë. Dhe nëse ajo qeveri detyron dhe shpërndan certifikata të falsifikuara, atëherë që në nisje ka një start të gabuar. Ka një asamble dhe ka një president, pra që në nisje ka një start të gabuar, pasi është vërtetuar që këto shoqata nuk janë të regjistruara, nuk kanë asnjë lloj platforme, nuk kanë asnjë lloj gjëje.
A ka gisht Armando Duka në këtë proces?
Ai është përgjegjësi kryesor, ai dhe asambleja sepse nuk mund të fshihesh dot dhe të thuash po jo gjykata na ka licencuar ne! Gjithçka është e thjeshtë, këto janë shoqata të palicencuara! E kujt është përgjegjësia pastaj, është e jona?
“Ai që e organizon këtë, ai të mbajë përgjegjësinë! Është e rëndë kjo! Këtu po luhet me demokracinë, nuk ka më demokraci”, përfundoi Idrizi për Tirana Today.
Asambleja e FSHF-së ka në përbërje 66 anëtarë të cilët kanë të drejte vote, ku 8 prej tyre rezultojnë të jenë shoqata rajonale të futbollit amator. Problemi është se këto shoqata nuk figurojnë të regjistruara në gjykatë, pra janë shoqata fantazmë, të cilat njihen vetëm nga FSHF-ja por jo nga organet e shtetit shqiptar. TIRANA TODAY
