Nga Nijazi Mema/Shpejtësia për të përçuar lajmin i pari, shpeshherë për të mos thënë me shumë se kaq, ka krijuar një realitet mbytës dhe aspak me perspektivë për median dhe profesionalizmin e saj.
Lajmi i gënjeshtërt për kampionen e botës, se gjoja i paskan diktuar më parë se ajo do përgatitet për humbje ndaj një sportisteje serbe, bëri xhiron e rrjetit, ndërsa media për ca klikime “vrastare” nuk i shpëtoj këtij mallkimi.
Trendi i gabuar po shkatërron shëndetin mendor të njerëzve, ndërkohë media po përgatitet t’i bëjë funeralin vetvetes.
Një qasje shterpë, një shmangie nga realiteti, një përpjekje e dështuar që në zanafillë është pasqyra, që natyrisht shumë media por jo të gjitha, e kanë si kryefjalë te punës së tyre në përditshmëri.
Lajmet e sotme për të “artën e botës” mbytën opinionin publik, ndërsa pashë me vëmendje se shumë pak media kishin bërë hapin e parë në gazetari, duke verifikuar këtë informacion të turpshëm dhe pa asnjë bazë vërtetësie.
Kjo duhet bërë në çdo kohë, pa asnjë mëdyshje, sepse duke bërë punën e drejtë të gjithë dalin fitues. Media si pushtet i katërt duhet të ruajë interesin publik dhe jo ta shkatërrojë atë. Më mirë i fundit dhe i saktë, sesa i pari dhe shumë qesharak.
Majlinda Kelmendi do vijoj të ketë medalje të arta dhe shumë suksese, një përpjekje e juaja për të shkatërruar një sukses të tillë do të ketë një fund te dhimbshëm, nëse nuk shkëputemi nga përçimi i informacioneve të paverifikuara.
Bombat bajate në rrjetet sociale dhe e ashtuquajtura si “Fake News” jo vetëm po largojnë lexuesin, por po mbjellin një kulturë të keqe për median në tërësi.
Majlinda do të ketë shumë medalje të arta, ndërsa mediat duhet të përgatiten për ceremoninë e “varrimit” ndaj vetes.
