Nuk ka fitues në “Stamford Brigde”, është mbyllur në barazim 1-1 e për 1/8-t e finaleve të Champions League mes Chelsea dhe Barcelona, rezultat që favorizon katalanasit për ndeshjen e kthimit që do të luhet pas 21 ditësh në “Camp Nou”. Dy golat u realizuan në pjesën e dytë, fillimisht ishte braziliani Willian që zhbllokoi rezultatin dhe më pas Messi me të vetmen gjuajtje që bëri në portë.
Pjesa e parë u mbyll në barazim dhe ishin katalanasit që dominuar, por nuk ishin të rrezikshëm para portë. Nga ana tjetër Chelsea kishte dy shanse mjaft të mira për të kaluar në avantazh me Willian, por topi preku shtyllën në të dy rastet. Ishte hera e parë që nga janari 2016 që Barça i mbylli 45 minutat e para në një ndeshje të Champions League pa e goditur qoftë edhe një herë kuadratin e portës kundërshtare.
Në fillimin e pjesës së dytë, Courtois priti goditjen e Luis Suarez dhe për sulmuesin uruguaian vazhdon “agjërimin” në Champions League ku nuk ka shënuar asnjë gol në 871 minutat e luajtura. Kur u mbush një orë lojë, Willian nuk u dënua më nga fati. Këtë herë goditja nga jashtë zone e brazilianit shkoi në cepin e portës së mbrojtur nga Ter Stegen, duke kaluar në avantazh vendasit në “Stamford Bridge”. Gjithsesi, çerekore para fundit, duke përfituar nga një gabim në pasim i Christiansen, Barça gjeti golin e barazimit kur Iniesta shërbeu për Messi në qendër të zonës dhe argjentinasi, krejtësisht i vetëm shënoi golin e tij të parë kundër Chelsea.
