Anglezi që është vënë nën hetim nga Policia e Shtetit pasi dyshohet se ka shërbyer si informator në vrasjen e Ardian Nikulajt, është shprehur se nuk do të shkelë më në Shqipëri. Siç raportohet, në dëshminë e dhënë përpara grupit hetimor, pronari i hotelit në Shëngjin, ku qëndroi anglezi, ka thënë se pas ngjarjes ai është larguar menjëherë dhe ka thënë se nuk do të kthehet më kurrë në Shqipëri.
Shkak është bërë fakti që ka parë me sytë e tij ekzekutimin e një personi. Megjithatë, dyshimet për përfshirjen e tij janë ended he hetimet vijojnë. Shteti shqiptar ka nisur një letërporosi dhe po kërkon të bjerë në kontakt me turistin e huaj që dyshohet se organizatorëve të atentatit u ka shërbyer si informator.
Anglezi është larguar menjëherë pas vrasjes nga Shëngjini. Ai ka shkuar në Rinas, por rrugës ka ndërruar dy taksi gjë që ka futur në dyshimet hetuesit. Me taksinë e parë, anglezi ka shkuar deri në Fushë Krujë, aty ku ka marrë taksinë e dytë. Më pas ka mbërritur në Rinas, aty ku i ka hipur avionit dhe ka fluturuar për në vendin e tij.
Ardian Nikulaj u ekzekutua mesditën e 19 prillit kur sapo kishte hyrë dhe ulur në një tavolinë në lokalin në pronësi të tij në vijën e parë të plazhit të Shëngjinit. Autori, siç u pa nga pamjet, mbante një maskë kirurgjikale, skafandër dhe jelek fosforeshent. Ai futet në lokal, qëllon me armë Nikulajn dhe pasi kryen vrasjen me pistoletë në një distancë shumë të afërt largohet qetësisht me motor nga vendngjarja.
Nikulaj ishte biznesmen në Lezhë, ish-kandidat për deputet në zgjedhjet e 2021-shit dhe kandidat për Këshill Bashkiak në zgjedhjet e 14 majit. Viktima rezulton i arrestuar më herët për armëmbajtje pa leje dhe kontrabandë e falsifikim, ndërkohë që pista ku po hetohet është ajo e gjakmarrjes. Kjo pasi Nikulajt i është vrarë një vëlla nga pjesëtarë të fisit Balaj. Kjo ngjarje është pasuar në dy të vrarë nga familja Balaj dhe për asnjërën nga ngjarjet nuk ka pasur të arrestuar. Nuk përjashtohen konfliktet për bizneset apo politikën. Deri më tani raportohet se në atentat kanë marrë pjesë të paktën 3 persona. Dy prej tyre kanë marrë pjesë si vëzhgues, ndërsa një ka qenë organizatori.
