Interi mposhti Cagliarin një natë më parë me rezultatin 3-1, ku protagonist kryesorë padyshim ka qenë sulmuesi argjentinas Mauro Icardi. Ky i fundit arriti ta dërgonte dy herë topin në rrjetë. Në 14 javë kampionat Icardi ka arritur të shënojë 15 gola, statistika fantastike të cilat kanë bërë që ata të mendojnë për titullin kampion në Serie A edhe pse ka ende shumë ndeshje.
“Ishte një ndeshje e vështirë, madje e ndërlikuar, por që u bë më e lehtë pas golit të parë. Enë pjesën e dytë luajtëm mirë, duke kërkuar golin e dytë dhe më pas e mbyllëm ndeshjen në favorin tonë”, tha Icardi.
Icardi nuk e ka fshehur idenë se tashmë ekipi është kthyer të mendojë për titullin dhe shanset janë të mëdha pasi kanë një skuadër mjaft të konsoliduar. Ndërsa nga ana tjetër ka mohuar në mënyrë kategorike një largim të mundshëm nga zikaltërit, ku është edhe kapiten i ekipit.
“Po shijojmë këtë kryesim dhe sot jemi gdhirë në krye të renditjes. Nuk është pak, por e kemi merituar. Të tjerët duhet të kuptojnë se edhe ne jemi aty, mes më të mirëve. Jam në formë dhe mund të kisha realizuar edhe një gol të tretë, por jam i kënaqur për fitoren. Ne mendojmë për titullin, është e kotë ta fshehim këtë gjë edhe pse kampionati është ende i gjatë. Nëse më telefonojnë nga Madridi? Nuk do t’i përgjigjesha telefonit”, tha Icardi.
