Thanas Xhillari, ish-bashkëshorti i Linda Ramës, është një nga pedagogët e denoncuar vazhdimisht nga ana e studentëve, pasi kërkon deri në 700 euro për dhënien e një provimi.
E sikur të mos mjaftonte kjo, Lëvizja ‘Për universitetin’ ka publikuar një tjetër shkelje të pedagogut, që zhvillon mësim në Fakultetin e Shkencave të Natyrës. Ish-bashkëshorti i Linda Ramës, akuzohet se ka zgjatur kontratën e punës pas mbushjes së moshës së pensionit, në shkelje flagrante të ligjit të arsimit të lartë.
“Nga hulumtimi i deritanishëm, kemi zbuluar se Thanas Xhillarit, të ditëlindjes 31 korrik 1953, i është zgjatur kontrata e punës pas mbushjes së moshës së pensionit në shkelje flagrante të ligjit të arsimit të lartë 80/2015. Në nenin 65 (Kohëzgjatja e punësimit të personelit akademik), pika 2 shkruhet qartë:
“Personeli akademik, që mban titullin “Profesor i asociuar”, shërben në detyrë deri në moshën 65 vjeç. Mbështetur mbi nevojat e institucionit të arsimit të lartë dhe me pëlqimin e tij, ai mund të shërbejë në detyrë edhe pas moshës së lartpërmendur, përmes kontratave me kohëzgjatje deri në një vit, të përsëritshme, sipas përcaktimeve në statutin e institucionit të arsimit të lartë”, thuhet në reagimin në fjalë.
