“Një yll tjetër u shua”, Rosicky jep lamtumirën nga futbolli

Ish-mesfushori i Arsenalit dhe Borussia Dortmund, Tomas Rosicky është tërhequr përfundimisht nga futbolli i luajtur. 37-vjeçari, i cili u bashkua me klubin Sparta Prague në gusht 2016, zbuloi se trupi i tij nuk ishte më në formë për të përballuar futbollin profesionist. Edhe pse kontrata e tij mbaronte në qershor të vitit 2018, ai vendosi të tërhiqet që tani.

“Pas shqyrtimit të kujdesshëm kam kuptuar se unë nuk jam më në gjendje të përgatis plotësisht trupin tim për atë që kërkohet nga futbolli profesionist”, tha Rosicky në një konferencë shtypi të mërkurën. “Dëshiroj ta falënderoj Spartën që më dha mundësinë që ti jap lamtumirën futbollit në vendin që më pëlqente.”

Rosicky bëri debutimin e tij për Republikën Çeke në vitin 2000 dhe u emërua kapiten në vitin 2006. Ai u tërhoq nga futbolli ndërkombëtar në 2016 me 105 paraqitje dhe 23 gola mbajnë firmën e tij. Pas ardhjes në radhët e Sparta Pragës ai i ndihmoi ata të shpalleshin tre herë kampionë. Rosicky nënshkroi me Dortmund në vitin 2000 dhe u kushtoi atyre 18 milionë euro, duke e bërë atë lojtarin më të shtrenjtë në historinë gjermane asokohe.

Rosicky kaloi gjashtë vjet me Dortmundin përpara se të bashkohej me Arsenalin, ku ai fitoi dy FA Cup. Në sezonin e fundit për shkak të dëmtimeve Rosicky bëri vetëm një paraqitje për Arsenalin, por këto dëmtime asnjëherë nuk e shuan dashurinë e tifozëve për të. Performacat magjike, kontrolli i lartë i topit dhe dëshira për të shënuar gola spektakolarë e bënë atë një personazh shumë të dashur për tifozët në Emirates.

Duke folur për mesfushorin në vitin 2015, Arsene Wenger e përshkroi atë si “një lojtar që ne të gjithë e duam”, duke shtuar: “Nëse e doni futbollin, ju e doni Rosicky.” Duke folur për daljen në pension të ish-shokut të tij, Mesut Ozil tha: “Faleminderit më të mëdha për një lojtar me një zemër të madhe e një karrierë të shkëlqyer. Ju uroj të gjithëve më të mirët pas pensionimit tuaj.” Theo Walcott shtoi: “I uroj Rosickyt një pensionim sa më të mbarë, jam i nderuar që kam luajtur përkrah tij.”