Tashmë prej vitesh porta e ekipit të Lazios ka qenë e siguruar nga gardianët kuqezi. Fillimisht ishte Etrit Berisha që kaloi disa sezone fantastike tek të kaltrit dhe më pas u transferua tek Atalanta. Ndërsa aktualisht ai që po mahnit Serie A dhe gjigantët e futbollit europian është, Thomas Strakosha. Ai është kthyer në një nga shtyllat e ekipit lacial, pasi në një moshë të re ka treguar klas dhe siguri të madhe në prapavijën, duke marrë vendin e titullarit.
Por historia e portierëve shqiptar tek Lazio nuk mbaron me kaq, një tjetër talent pritet të shpërthejë në radhët e tyre, gardiani i ri me kombësi shqiptare është Marco Alia. Ai është grumbulluar nga Erjon Bogdani për dy ndeshjet miqësore që do të zhvillojë ekipi kombëtar U-19, ndaj Lazakistanit, që do të zhvillohen në qytetin e Lushnjës në datat 24 dhe 27 mars.
Për Alian kjo nuk është eksperienca e parë në radhët e përfaqësues U-19, pasi ai ka qenë pjesë e ekipit edhe vitin e kaluar gjatë turneut “Roma Caput Mundi”, event që u fitua nga kuqezinjtë. Alia foli për “Supersport” në lidhje me eksperiencën e tij te ekipi i të rinjve të Lazios. Talenti shpreson që edhe ai të ketë të njëjtin fat si Berisha dhe Strakosha.
“Te Lazio kemi një trajner portierësh shumë të mirë që punon shumë me ne, që të ngjitim kategoritë deri në Serinë A. Të jesh pjesë e Kombëtares Shqiptare të bën krenar. Jam shumë i lumtur.”
Më tej Alia shprehet se dy ndeshjet miqësore ndaj Kazakistanit do t’u shërbejnë lojtarëve për t’u njohur më shumë me njëri-tjetrin.
“Janë miqësore për të konsoliduar grupin. Trajneri më pas do të vendosë për ata që do të luajnë në eliminatore. Unë do të përpiqem të bëj më të mirën dhe jam i bindur se me punë mund të arrijmë gjithçka.”
