Një makinë sportive e shumë luksove e tipit “Lamborghini Huracan” i është dhuruar mëngjesin e sotëm Papa Françeskut. Dhurata për Atin e Shenjtë është bërë nga shtëpia e automjeteve të Sant’Agata Bolognese, “Ad Personam”.
Makina është e bardhë me disa vija të verdhë, në homazh me ngjyrat e flamurit të Qytetit të Vatikanit. Mjeti me autografin e Papës do të dalë në ankand nga RM Sotheby më 12 maj të vitit 2018. Nga Dhoma e Përfaqësuesve të Vatikanit bëhet e ditur se pastaj çeku do t’i dorëzohet Papa Françeskut, i cili ka vendosur që ta dhurojë për tre projekte të ndryshme.
Fillimisht Ati i Shenjtë ka vendosur që të mbështesë projektet dedikuar grave dhe fëmijëve, nga dy shoqata italiane që zhvillojnë aktivitetet e tyre në Afrikë. Ndërsa një pjesë tjetër e të ardhurave do të shkojë për organizatat bamirëse katolike për të bërë të mundur kthimin e të shpërngulurve të krishterë në Irak. Gjithashtu paratë do të shkojnë edhe për të ndihmuar viktimat e trafikimit seksual në Itali.
