Na ndajnë dhe gati dy muaj nga finalet e mëdha të Botërorit që do të zhvillohet në Rusi. Argjentina ishte një ndër pretendentët, por turpërimi që i bëri Spanja në ndeshjen miqësore ia uli pretendimit. Por në këtë sfidë mungonte Lionel Messi, njeriu tek i cili beson e gjithë Argjentina. Për këtë ka folur një nga legjendat argjentinase që ka fituar Botërorin e vitit 1986, Oscar Ruggerit.
Sipas tij, Messi nuk duhet të luajë më me Barcelonën, por të përqendrohet në Botërorin e Rusisë. “Leo mund të marrë në telefon presidentin e klubit dhe t’i thotë që nuk do të luajë me skuadrën, por do t’i përkushtohet vetëm kombëtares. Ju mendoni se Barcelona nuk e fiton kampionatin po nuk luajti Messi? T’i thotë që kjo është Kupa e tij e Botës dhe të nisë përgatitjet për Botërorin”, deklaroi ish-mbrojtësi.
Më tej, Ruggeri shtoi se në vitin 1986, futbollistët argjentinas nisën përgatitjet 65 ditë përpara turneut. “U përqendruam në atë Botëror 65 ditë përpara. U mblodhëm të gjithë bashkë për të përgatitur aventurën në Meksikë”, theksoi Ruggeri.
